കണ്ണൂർ: മാസപ്പടിക്കേസുമായി ബന്ധപ്പെട്ട് സിപിഎം വിപുലീകൃത ജില്ലാ കമ്മിറ്റി യോഗത്തിൽ പിണറായി വിജയന് വിമർശനം. വീണാ വിജയനെതിരായ കേസിനെ പാർട്ടിക്കെതിരായ ആക്രമണമായി ചിത്രീകരിച്ചത് എന്തിനാണെന്ന് പ്രതിനിധികൾ ചോദിച്ചു. കണ്ണൂരിൽ ചേർന്ന സിപിഎമ്മിന്‍റെ വിപുലീകൃത ജില്ലാ കമ്മിറ്റി യോഗത്തിലാണ് പാർട്ടി സ്വീകരിച്ച നിലപാടിനെ ചോദ്യം ചെയ്ത് പ്രതിനിധികൾ രംഗത്തെത്തിയത്.
വീണാ വിജയനെതിരെ അന്വേഷണം വന്നപ്പോൾ പാർട്ടി എന്തിനാണ് പ്രസ്താവനയിറക്കിയത്. കേസിൽ പാർട്ടി പ്രതിരോധം തീർക്കേണ്ട സാഹചര്യം എന്തായിരുന്നുവെന്നുമാണ് യോഗത്തിൽ ചോദ്യമുയർന്നത്. മറ്റ് നേതാക്കളുടെ കുടുംബാംഗങ്ങൾക്കെതിരായ കേസുകളിൽ സ്വീകരിച്ച നിലപാടിൽനിന്ന് വ്യത്യസ്തമായ സമീപനം വീണയുടെ കാര്യത്തിൽ സ്വീകരിച്ചത് എന്തുകൊണ്ടാണെന്നും പ്രതിനിധികൾ ചോദിച്ചു.
മുൻ സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്‍റെ മകനെതിരായ കേസിൽ വ്യക്തിപരമായി നേരിടട്ടെയെന്ന നിലപാടാണ് പാർട്ടി സ്വീകരിച്ചതെന്ന് യോഗത്തിൽ ചൂണ്ടിക്കാട്ടി. മുൻ മുഖ്യമന്ത്രി വി.എസ്.അച്യുതാനന്ദന്‍റെ മകന്‍റെ കാര്യത്തിലും സമാനമായ സമീപനമായിരുന്നു പാർട്ടിയുടേത്. എന്നാൽ വീണാ വിജയനെതിരായ കേസിൽ മാത്രം പാർട്ടി ഇടപെട്ട് പ്രതിരോധം തീർത്തത് എന്തിനാണെന്ന ചോദ്യമാണ് യോഗത്തിൽ ഉയർന്നത്.
കോൺഗ്രസിൽ മാത്രമല്ല മുന്നണിക്കുള്ളിലും അതൃപ്തി
തിരുവനന്തപുരം: മാസപ്പടി കേസിൽ മുൻ മുഖ്യമന്ത്രിയും നിലവിലെ പ്രതിപക്ഷ നേതാവുമായ പിണറായി വിജയനെ അനുകൂലിച്ചു ഹൈക്കോടതിയിൽ നിലപാട് സ്വീകരിച്ചതിനെതിരേ കോൺഗ്രസിനുള്ളിലെ അതൃപ്തി യുഡിഎഫിലേക്കു പടരുന്നു. എജിയുടെ നിലപാട് നിരാശാജനകമാണെന്നും യുഡിഎഫ് സർക്കാരിന്‍റെ പൊതു നിലപാടിന്‍റെ നിറം കെടുത്തുന്നതാണെന്നുമാണ് കെ.കെ. രമ ഫേസ്ബുക്ക് പോസ്റ്റിൽ കുറിച്ചിരിക്കുന്നത്. ഇതിനെതിരേ ഉയരുന്ന വിമർശനങ്ങളെ സർക്കാർ പരിഗണിക്കണം. പിണറായി വിജയൻ പ്രതിപക്ഷ നേതൃപദവി ഒഴിയണമെന്നും രമ ആവശ്യപ്പെട്ടു.
ഇതേ സമയം ഉമ്മൻ ചാണ്ടിയുടെ തട്ടകമായ കോട്ടയത്ത് വ്യാപകമായ രീതിയിൽ പോസ്റ്റർ ഇറക്കിയാണ് കോൺഗ്രസ് പ്രവർത്തകർ ഈ വിഷയത്തിൽ പ്രതികരിക്കുന്നത്. ഒന്നും മറന്നിട്ടില്ല വിജയാ എന്ന ബോർഡിൽ, “ഞങ്ങളുടെ സാറിനോട് ചെയ്തതൊന്നും മറക്കാനാവില്ല ഞങ്ങൾക്ക്’ എന്നും പറയുന്നു. കോൺഗ്രസ് പ്രവർത്തകർ എന്ന പേരിലാണ് ഫ്ലക്സുകൾ പ്രത്യക്ഷപ്പെട്ടത്. നഗരത്തിൽ പലയിടത്തും ബോർഡുകൾ സ്ഥാപിച്ചിട്ടുണ്ട്.
സോളാർ കേസിൽ ഉമ്മൻ ചാണ്ടിയെ വേട്ടയാടിയെന്നു വൈകാരികമായി ഓർമിപ്പിച്ചാണ് ഒരു വിഭാഗം കോൺഗ്രസുകാർ നീക്കം കടുപ്പിക്കുന്നത്. പിണറായി അനുകൂല വാദം ഉയർത്തിയ എജിയെ പിന്തുണച്ചതിലടക്കം പാർട്ടിയിൽ കടുത്ത വിമർശനമുണ്ട്. ആദ്യം അന്വേഷണമെന്നതാണ് ശരിയായ പാർട്ടിലൈൻ എന്ന് മുഖ്യമന്ത്രിയും ആഭ്യന്തരമന്ത്രിയും ആവർത്തിക്കുമ്പോഴാണ് തിരുത്തുമായി ഉമ്മൻ ചാണ്ടിയുടെ നീതിനിഷേധം അടക്കം ഓർമിപ്പിച്ചുള്ള എതിർചേരിയുടെ നീക്കങ്ങൾ. മാത്യു കുഴൽനാടൻ തുടങ്ങിവച്ച വിമർശനം മറ്റ് എംഎൽഎമാരും നേതാക്കളും ഏറ്റുപിടിക്കുകയായിരുന്നു.
കോൺഗ്രസ് വക്താവ് ജിന്‍റോ ജോണും വി.ആർ. അനൂപുമടക്കമുള്ളവരും സി.ആർ. മഹേഷ് എംഎൽഎയും ഉമ്മൻ ചാണ്ടിക്ക് പിണറായി സർക്കാർ നീതി നിഷേധിച്ചത് ഓർമിപ്പിച്ച് രംഗത്തുവന്നു. മാത്യു കുഴൽനാടന് പിന്തുണയുമായി കൂടുതൽ നേതാക്കൾ രംഗത്തെത്തിയപ്പോൾ മുഖ്യമന്ത്രിയെ പിന്തുണച്ചും സർക്കാർ നിലപാടിനെ വൈകാരികമായി കാണേണ്ടെന്നും ഓർമിപ്പിച്ച് ഒരു വിഭാഗം നേതാക്കളും രംഗത്തെത്തി. അനാവശ്യ വൈകാരിക പ്രതികരണമെന്നാണ് സർക്കാർ അനുകൂലികൾ പറയുന്നത്.
ഇതേസമയം പൂർണമായും സർക്കാർ നിലപാടിനും മുഖ്യമന്ത്രിയുടെയും അഭ്യന്തരമന്ത്രിയുടെയും വാദങ്ങൾക്കും പിന്തുണ നൽകിയാണ് കെ. മുരളീധരന്‍റെ പ്രതികരണം. സിഎംആര്‍എല്‍- എക്‌സാലോജിക് കേസില്‍ സര്‍ക്കാര്‍ ചെയ്തത് 101 ശതമാനം ശരിയാണെന്ന് മുരളീധരന്‍ പറഞ്ഞു.
കോണ്‍ഗ്രസ് പാര്‍ട്ടിക്ക് ഇഡിയോട് ഒരു നിലപാടുണ്ട്. ഇഡി എന്തെങ്കിലും കേസ് കൊണ്ടുവന്നാല്‍ ഉടനെ കയറിയങ്ങ് ചാര്‍ജ് ചെയ്യാനാവില്ല. ഡല്‍ഹിയില്‍ ഒരുനയം കേരളത്തില്‍ വേറെ ഒരുനയമല്ല ഇക്കാര്യത്തില്‍. എല്ലായിടത്തും ഇഡിയോട് ഒരേ സമീപനമാണ്. ഇഡി രേഖാമൂലം പരാതി തന്നപ്പോള്‍ പ്രാഥമിക അന്വേഷണം നടത്താതെ കേസ് രജിസ്റ്റര്‍ ചെയ്യേണ്ടെന്നാണ് പാര്‍ട്ടി തീരുമാനിച്ചത്. ഹൈക്കോടതി കേസ് എടുക്കാന്‍ പറഞ്ഞപ്പോള്‍ സര്‍ക്കാര്‍ കേസ് രജിസ്റ്റര്‍ ചെയ്തു. ഇക്കാര്യത്തില്‍ പാര്‍ട്ടിയിലും സര്‍ക്കാരിലും ഭിന്നാഭിപ്രായമില്ലെന്നും കെ. മുരളീധരന്‍ പറഞ്ഞു.
നിയമസഭാ സമ്മേളനത്തിനുശേഷം പിണറായിയുടെ മൊഴിയെടുക്കും
തിരുവനന്തപുരം: പ്രതിപക്ഷ നേതാവ് പിണറായി വിജയനും മരുമകൻ മുഹമ്മദ്‌ റിയാസും പ്രതികളായിട്ടുള്ള മാസപ്പടികേസിൽ വിജിലൻസ് വിശദമായ അന്വേഷണം തുടങ്ങുന്നത് നിയമസഭാ സമ്മേളനത്തിന് ശേഷം. ഇതു സംബന്ധിച്ചു പ്രത്യേക അന്വേഷണസംഘം അന്തിമ തീരുമാനത്തിലെത്തി.
കേസുകളിൽ പ്രതികളായ സിഎംആർഎൽ ജീവനക്കാരിൽനിന്നും റിയാസിന്‍റെ സുഹൃത്തുക്കളിൽനിന്നുമാണ് ആദ്യം മൊഴിയെടുക്കുന്നത്. ഇതിനുശേഷം മാത്രമേ പിണറായി വിജയൻ, മകൾ വീണ, മരുമകൻ മുഹമ്മദ്‌ റിയാസ് എന്നിവരിൽനിന്നു മൊഴി രേഖപ്പെടുത്തുകയുള്ളൂ.
സിഎംആർഎൽ ഉടമ ശശിധരൻ കർത്താ, ഫിനാൻസ് മാനേജർ സുരേഷ് കുമാർ, റിയാസിന്‍റെ സുഹൃത്തുക്കൾ എന്നിവരെ ആദ്യം ചോദ്യംചെയ്യാനാണ് വിജിലൻസ് തീരുമാനം. രണ്ട് പ്രത്യേക അന്വേഷണസംഘമാണ് കേസ് അനേഷിക്കുന്നത്. തിരുവനന്തപുരം, കോഴിക്കോട് സ്പെഷ്യൽ യൂണിറ്റുകളിലെ എസ്പിമാരായ സുരേഷ്, ബാലകൃഷ്ണൻ എന്നിവരെയാണ് അനേഷണം നടത്താൻ നിയോഗിച്ചിരിക്കുന്നത്. മുഖ്യമന്ത്രി പദം പിണറായി വിജയൻ ദുരുപയോഗം ചെയ്തെന്നും മാസപ്പടി വാങ്ങാൻ സിഎംആർഎൽ കമ്പനിയുമായി ചേർന്നു ഗൂഢാലോചന നടത്തി 3.26 കോടി രൂപ കൈക്കൂലിയായി വീണ മുഖേന വാങ്ങിയെന്നുമാണ് വിജിലൻസ് എഫ്ഐആർ. ഇഡി റിപ്പോർട്ടിന്‍റെ അടിസ്ഥാനത്തിൽ ഹൈക്കോടതി നിർദേശാനുസരണമാണ് വിജിലൻസ് കേസെടുത്തത്.
രണ്ട് കേസുകളിലും പന്ത്രണ്ടു പേർ പ്രതികളായിട്ടുണ്ട്. വിജിലൻസ് കേസിന്‍റെ ചുവടുപിടിച്ച് ഇഡി പിണറായിക്കെതിരേ ഇസിഐആ രജിസ്റ്റർ ചെയ്തിരുന്നു. വെള്ളിയാഴ്ച ചോദ്യം ചെയ്യലിന് ഹാജരാകണമെന്ന് കാട്ടി ഇഡി പിണറായിക്ക് സമൻസ് നൽകിയിരിക്കുകയാണ്.
